أمل جبار - بقلم مصطفى هاشم

غلطة

إن أنا حبيت

و ف بحر الهوى تاني

بقيت أناني

وفيه طبيت

حقيقي الحب ده أعمى

وأنا أعمى

ماشفتش موجه كان عالي

وعلى باب الأمل دقيت

اتاري كان أمل جبار

وبحره لف بيا ودار

وموجة تشدني لموجة

أنا ف تيار

لا انا قادر أغادرها

ولا عارف أكون بحار

حقيقي الحب كله مرار

ونار

في البحر حرقاني

أنا مخلص . ؟

ولا أناني .؟

سؤال حيرني في هواها

بحبها نفسي ألقاها

وبلقاها في كل حروفي وكلامي

قصيدة حب مكتوبة

لكن توبة

هحاول اني ما اتكلم

واكون جاهل ولا اتعلم

ولا هكتب أمل تاني

وأعود للحسرة وأتألم

و أهي غلطة

إن أنا حبيت

ويامه الجرح بيعلم

------------

» أمل . بقلم مصطفى هاشم
» بس ليه . بقلم مصطفى هاشم
» وتسالونى ..؟ بقلم مصطفى هاشم
» بنت ابوها - بقلم مصطفى هاشم
» هقولك - بقلم مصطفى هاشم