أنا مش جبان . بقلم مصطفى هاشم

أنا كنت ساكت يا وطن
علشان بحبك

وبحب كل الناس
تشاركني في حبك

بس النهارده يا وطن
تايه في دربك

وعمري ما حسيت بغربة
قد ما حسيت في حضنك

ليه بينكروا حقى فيك
هو أنا مش برضو ابنك

واستحلوا دمي بيك
هو انا مش دمي دمك

نفسي أفهم أيه جريمتي
هو جرم أني حبك

هو حرام إني أقول
اني ولدك وانى منك

ولا أنا علشان ؟؟؟؟
يبقى المشير هو اللى ابنك

ليه بيكتم صوتي لما
أرفعه بكلمة عشقتك

ليه بيطلق نار عليا
لو حاولت ارسم ملامحك

ليه بيخطف منى أسمى
اللى حفره جوى صخرك

نفسي شمس الحق نورها
يحرق الظلم اللى جمك

نفسى اشوف الناس سوى
قبطى ومسلم كله ضمك

نفسي تتحقق أماني
ثورة الشعب اللى قام لك

ولأني أبنك يا وطن
ولأنه جوى وريدي دمك

مهما حاولوا يكتموا في صوتي بحبك

وروحي ويا جروحي ترخص
والتمن إني بحبك

كلمة قالتها لي أمي من زمان
اللي يتهاون في حبه يعيش جبان

واللي يتنازل في حقه مهما كان
يعيش حياته زى كلب مالوش مكان

وأنا حبي ليك عشق وجنون
وأبويا عمره ما كان جبان

وزي ما خد حقه أبويا م اليهود
حقى راح أخده وفي الميدان

يا نعيش سوى إخوان وصحبه
يا حرب على طول الزمان

» أمل . بقلم مصطفى هاشم
» بس ليه . بقلم مصطفى هاشم
» حلم حياتي . بقلم مصطفى هاشم
» مش هو ده نيلك . بقلم مصطفى هاشم
» قنا هي الاساس - بقلم مصطفى هاشم